A chi se ricorda del nostro bel mar, nesun altro ghe par preciso. Questa xe almeno per mi una granda verità. El nostro mar, fondo tanto de gaver fora del molo, i ne contava de muli, un sommergibile austriaco affondado. Sarà stà vero o no, ma per noi mularia era un bel mito. Un mar vero, pericoloso, coi pessecani e con sul fondo robe de due guere. Anche un aroplan inglese, con le bombe drento e le maone tedesche che girava durante la guera con un fracasso de motori che se sentiva fin a Cosala. Un mar indove i veci contava che se gaveva afondado un vaporeto che vegniva da le isole e che ghe era stadi tanti naufraghi tra la gente che vegniva a Fiume per far compere.
E come non ricordar el Molo longo o el bagno comunal “Nettuno”. Mi mulo picio, podevo andar solo su quela strana zatera de legno indove che se stava in aqua fin al colo, perché la era come una piscina galegiante: ma ocoreva anca star atenti a indove che se meteva i piedi sul fondo de le tavole, perchè tra mezo ghe era anche spazi svodi. Là go imparà a nudar. Ma meio era andar a Cantrida, indove che non se pagava, e indove che era tuti grembani o, come che se dixi in italian, scogli e le putele se spoiava tra le graie. Là sui sassi se podeva ingrumar anche le pantalene. Ma certe volte se vegniva fori del mar tuti sporchi de “smir” che la Romsa o le navi petroliere che era al largo e che se lavava le stive, molava in acqua de scondon. E alora con la benzina, co tornavimo a casa, la mama ne netava, mandando zo un accidenti a noi, che gavessimo dovudo star più atenti indove che se bagnavimo.
E pescar con le togne? Chi de voi non lo ga fato? La roba più bela era costruirsele con le code de caval, con suzo l’amo e un tocheto de sughero, per tegnir a gala un toco de filo. I muli più ganzi i gaveva bele togne e inseti sul amo, cussì i tirava suzo bei pessi, che dopo, per farli morir i li sbateva sui sasi. Quante slitade sul mus’cio dele grote e che mal de piedi sui sasi in fondo del mar. E chi non ghe ga tocado pestar sui spini dei teribili rici de mar ,e po sotoporse a operazioni dolorose che ghe tocava a le mame, che con un ago le ne li doveva cavar uno per uno. E che urli e che zighi. Per poi sentirse dir: “Te gavevo deto de star atento ai rici. Ti ti guardi solo le mule, invece de star atento a indove che ti meti i piedi, malegnaso mulo”.
E le fionde? Chi che trovava i rami dela forma giusta per far la fionda ghe andava po a domandar dai gomisti tochi de camere d’aria per farse el lastigo e tacarlo a un bel toco de pele per tegnir ben el saso. Era un artigianato nobile. Se se distingueva per come che era fata la fionda e con essa se se giogava giradi verso el mar a chi che tirava più lontan el sasso. E chi che ghe la faceva era ganzo. Ma se tirava anche ai uzei, senza ciaparli mai, perché i svolava via sempre prima che arivassi el sasso. Bei ricordi de mulo. Era i momenti più bei de la mia vita.
Erimo fioi asai coragiosi. Chi non se ricorda come certi muli andava a nudar fora de le reti dei bagni dove che ghe era pericolo de pessecani. De quando che stago in Italia non li go visti mai in nessun logo, ma a Fiume go visto un pessecan al largo. E me ricordo anca che i contava che a Ika el gaveva magnà un polacco che el se gaveva butà a nudar de matina presto, apena rivado, solo lui in aqua e gnanche tanto in fora. Per arivar in Molo longo, inveze, mi che stavo dele parti Cosala me calavo passando soto el Palazzo del governator, e me ricordo che se dava sempre una ociada a una casa che gaveva l’ingresso tutto de piastrele bianche, come el bagno de casa nostra. Era roba per grandi. Là drento andava solo omini e soldati. Se ghe dixevo a mia mama che passavo de là, la me zigava sempre: “Cosa ocore che ti vadi de quela piazzeta. Solo a quardar ti pol ciapar malatie”. A quei tempi non se vedeva girar per strada babe strane spetar chissa cossa, come che suzede ogi in giro per el mondo. Era tuto più sconto e riservado.
El mar, per dir, per mi arivava fin Cosala, perchè de casa nostra se lo vedeva ben con tute le isole e el Monte Magior in fondo, e se tirava vento se sentiva anca el salmastro. El Monte magior era el nostro barometro.”Se el ga el capel pioverà” dixeva i nostri veci. E uno de lori a Cosala era famoso. El gaveva un dente solo, e la mularia contava che el ghe ocoreva per sbuzar i biglieti del tram che portava a Cantrida. A Cosala indove che se fermava la coriera che vegniva de piaza Dante, ghe era anche el Pucikar, famoso pistor, e di fronte, in un picio boteghin indove che se se calava andando zo per due scalini, un caligher. Dela curva se vedeva tuta Tersato, più in fondo Portorè e, soto la strada che andava verso Santa Caterina, la casa del mio maestro dele scole elementari. Più in zo ghe era due cipressi che co ghe era sciroco ondegiava al vento che vegniva su del mar. Mi de mulo me piazeva asai caminar per el marciapiede nero che portava verso la scola de Cosala. Me ricordo che el era fato con le scorie del carbon de la fabrica del gas.
E l’asfalto gaveva tanti gnocheti spugnosi neri che mi me divertivo a spacar coi piedi. Ma tornando a parlar del mar, quel nostro bel mar, me torna inamente tanti ricordi che me struca el cor e non so se xe ben o se xe mal, ma a mi me comove ricordar tute ste robe.
