ANVGD_cover-post-no-img

Rinasser nel nome del Santo (Voce del Popolo 24 lug)

Se pol nasser due volte? Mi ve digo de sì! Mi son rinato el giorno de San Vito questo anno nela nostra Cattedrale de San Vito a Fiume. Sì a Fiume non pensavo de riussir a tornar, me ga porta un grande amico, Nereo Bulian e cussì el giorno dei nostri Santi patroni ero ne le panche coi oci che scorlava lagrime, podè creder, ma non ero solo, tuti i fiumani era con mi, sicuro i esuli e i residenti, ma sopratuto con mi era tuti i mii veci che non xe più, me li sentivo atorno, drento de mi e pregavo con la boca ma non era solo la mia preghiera son sicuro che i pregava lori con mi, con la mia boca. Guardavo per tera el marmo del pavimento e pensavo, qua ga messo i piedi la mia nona, la mia mama e su, su, tuti i mii antenati fiumani che i xe vegnudi con mi a farme rinasser ai piedi del nostro Sacro Crocifisso Miracoloso.

Son nato una seconda volta, credeme, mentre el coro “Fedeli Fiumani” fazeva de colona sonora. Tuti quei preti con cote sgargianti rosse i se moveva nel rito e i jera tanti, fra incenso e candelabri. Go scoltà le parole de la Omelia de Monsignor Ravignani in italian, me go comosso poi, quando i pici in corteo i ga portà i doni al altar, i pici fiumani. Si! son rinato, son rinato con lori che xe el futuro de la nostra Fiume che parla italian, pici tanto cocoli da non creder. Me go comosso, credevo de sciopar, el cor me bateva come un mato, ero ne la nostra Cattedrale nel giorno più importante per la nostra Fiume. Son passà drio l’altar del Sacro Crocifisso, go tocà el muro con una preghiera e i me ga sburtà fori perché se preparava la mesa dei fiumani de lingua croata, me go trovà fora e non volevo più andar via, credeme fra abrazi e strete de man, anca con chi non gavevo mai visto e non conossevo: ma chi era là era fiuman, alora era la mia famiglia.

Son nato una seconda volta e son sicuro che rinasserò tute le volte che poderò tornar ne la mia Fiume nel giorno de la ricorenza patronale. Adesso credo ai miracoli, sul muro a casa go el quadreto del nostro Crocifisso che la mama me ga insegnà a pregar. Ghe gavevo domandado a Lui de farme tornar a Fiume, almeno per un sofio prima de inveciar tropo; go gavu el miracolo, ma mi son sfaciado adesso, apena son tornà a casa a Monza me go inginocià davanti e ghe go deto: “Fame tornar ancora, te farò festa el prossimo anno, te prego non lassarme qua inveciar, fame tornar ancora ne la tua e ne la mia città, ripeti i miracoli, Sacro Santo Crocifisso ai cui piedi per generazioni ga pregà i mii veci, fame tornar ancora, voio rinasser ancora fiuman fra i fiumani tui devoti, fame tornar, te prego”.

Tratto da “La Voce di Fiume” del 30 giugno 2010

0 Condivisioni

Scopri i nostri Podcast

Scopri le storie dei grandi campioni Giuliano Dalmati e le relazioni politico-culturali tra l’Italia e gli Stati rivieraschi dell’Adriatico attraverso i nostri podcast.