Sbisigar fra le carte de casa, alle volte xe come dialogar con i nostri che non xe più. Queste xe robe che poso far solo adesso che son in pension e go voia de riveder i volti cari ma mai dimenticadi dei mii. Cussi go trovà dei scriti de la mia mama, fiumana, che la scriveva:
”Me era care le suore Benedettine (se parla del 1910), la Suor Edoarda Superiora, la Suor Placida, vigilatrice d’infanzia, suor Pia de Padova,quela che me ga insegnà ad amar l’Italia, Dante,i poeti e el Re d’Italia che allora regnava. La vita era bela nel Collegio de Graz, dove go passado quasi cinque anni; ma durante la guera non gavevimo pan e mi scondevo nel leto quel che la mama me mandava in pachetto da Fiume. La Suora Norberta Ethel, superiora, la gaveva un fratel archeologo che scriveva libri sull’Africa, sui fiumi, sulla flora e sulla fauna che dovevimo studiar. Poi el profesor de matematica e disegno, che me ga insegnà ad amar el color, e le mie amiche: tante ma soprattutto quela dalmata, che la me ga installà la febbre irredentista, l’amor per l’Italia e con essa, come i patrioti del risorgimento parlavimo de scondon in italian e se esaltavimo come i carbonari e quei de la Giovane Italia del Risorgimento. Crollada l’Austria, tornada a Fiume, dopo cinque ani xe arrivadi i legionari e el mio primo amor, el legionario Alfonso di Carlo che i mii non voleva che frequentassi e che dopo el me ga continua a scriver per due ani. Ma mi non savevo niente, perché la mia zia, impiegata de la posta, la intercettava e la faceva sparir le sue lettere. Me go amalà de dolor per questo. Era stà el tempo de D’Annunzio e come tanti fiumani de allora, ex sudditi dell’Impero presi da la ventada irredenista portada da sti baldi giovani italiani in divisa, anca mi me go iscritto subito ai “fasci de combattimento fiumani”. Noi a Fiume a quei tempi non savevimo ben cossa che era sti ‘fasci’ ma iscrivendose ne pareva de esser più italiani dei altri. L’Italia del ‘oio di ricino’ (la storia la go leta solo dopo) la ne era ignota. Così a Cantrida me gavevo distirà anche mi per tera con le altre mule fiumane per impedir che D’Annunzio lassi la nostra ‘Fiume d’Italia’…”
Così scriveva la mia mama in tei sui diari. Ogi per mi leger quel cha la ga lassa scrito xe come aprir la tomba de Tutankamon e trovar reperti archeologici, rimasti sepelidi per ani e ani in un quaderneto che, a insaputa de tuti, la scriveva. A queste sue memorie la ghe gaveva dado el titolo “Fiume la mia città nativa, mio amore perduto per sempre”.
In prima pagina la gaveva scrito: “Là a Fiume go la tomba dei mii antenati. Mai più sarò sepolta vicin a mio papà, el mio unico amor, morto a 27 anni nel pien de le sue speranze per un futuro del suo lavor e de la bottega che el gaveva apena aperto”. Quel che più me ga colpì de quel che mia mama ga lassa scritto xe i passi indove che la parla del suo intenso amor di Patria, de quela febbre fiumana che la gaveva per l’Italia
Quanti che era a quei tempi i fiumani che, come mia mamma, i se vantava de esser veri patrioti, che i se esaltava per Nazario Sauro, per Oberdan, per Cesare Battisti o Fabio Filzi. E a mi alle elementari la me vestiva con la montura de balilla, Me ricordo che vagego al collo el fazzoletto celeste coi leoni de Zara, indove che son nato per caso, perché a quei tempio mio papà lavorava alla Manifattura Tabacchi de Arbanasi.
Invecio, e come che faceva i nostri veci, parlo sempre de più de ricordi lontani. Po’ magari me dimentico cossa che go fato ieri, ma me ricordo sempre de più de quel che facevo de picio. Insomma go la testa sempre indrio, a Fiume e ai ricordi dei mii veci, finidi insieme con mi esuli in Pianura padana, a morir lontan del nostro mar e dei nostri monti.
Conto questo perché tuto quel amor de Patria che go sentì per tuta la mia infanzia sprizar fora dei pori dei mii veci fiumani, me par oggi quasi roba impossibile che fosse esistida. Ogi che el tricolor i lo tira fori solo se se vince un campionato de calcio.
Alfredo Fucci
