Sbisigando fra le carte de casa, me xe capità soto i oci el libretto militar del mio nono de la marina austroungarica e sfoiandolo trovo una pagina del “Probeschrift”, dove che scive in italian: “Sotto subordinazione s’intende il dovere dell’assoluta obbedienza che ogni sottoposto deve prestare al suo superiore diretto,per il bene del servizio. Pola .20 ottobre”. El documento xe controfirmado dal comandante Scarpa.
Ecco nela mia infanzia go dovù imparar a scola che sotto Francesco Giuseppe i italiani era perseguitadi.Go studià dele lotte risorgimentali, dele fucilazioni, dele impiccagioni, de Oberdan e de Silvio Pellico. Era de leger e studiar “Le mie prigioni”. Tuto vero. Tuto sacrosanto. Le nostre era terre cosidette “irredente”, la mia mama in colegio, a Graz, la sognava l’Italia ciacolando sottovoce con le compagne dalmate e istriane come i carbonari del risorgimento.
Leggendo el libretto de navigazion del nono: “Land-Ungarn”, vedo scrite bilingui in ungherese e in italian. Zerto a scola da le Benedettine la mama doveva studiar el ungarese e el tedesco. Ma in giro se parlava italian. El libretto del catechismo, stampado a Budapest nel 1914, xe scrito in italian (imprimatur Pro scholis Flumine praescribitur) con citato”l tempo di Pasqua prescritto per fare la s.comunione a Fiume comincia di solito la prima domenica di quaresima e finisce la domenica della Ss.Trinità”-ve par poco? Una citazion cussi specifica su un libretto stampado a Budapest, editrice la Società Santo Stefano.
Insomma sudditi de la Corona, ma riconossudi nei diritti de la la nazionalità specifica.Un Grande Impero che dominava tanti popoli, riconosseva le identità, non se insegnava forsi nel collegio dei Gesuiti de Fiume la nautica in italian.Ecco questo per mi era vero rispetto de le identità.
Ogi in Italia semo travolti de tante etnie diverse che sbarca coi gommoni attraversando i mari. Basta girar per i mercati o a le stazioni dei treni o dele coriere e se sente parlar le lingue più diverse. Soto casa mia un mendicante, scuro de pele, ogni giorno a le cinque del pomeriggio el se inzinocia su un carton e el prega rivolto a la Mecca. Per mi cattolico che prego quando me ricordo, xe squasi una specie de rimprovero. I tempi cambia. Una volta non erimo abituadi a gaver tanti foresti intorno de noi. Ogi i ghe xe dapertuto. E ne le classi a scola ogi tanti scolareti xe stranieri ma nati in italia e a le volte i xe più bravi a scola dei nostri. Ogi penso che el grande “Aulico Impero” de la “defonta” gaveva a la base una grande civiltà de rispetto dele identità. Ma capisso però anca che la vigilia del suo crollo ga avudo come conseguenza el sbejarse dei irredentismi ligadi a sogni, per esempio , come che era quel de una Italia madre della cultura per i sui poeti e i grandi artisti rinascimentali, che ga segnà la storia dell’Europa. Ecco voltandome indrio oggi faccio atto de rispetto per quel spirito mitteleuropeo de alora, che era capace de riconosser tute le identità etniche. Eppur sui libri de scola i ne imparava a disprezzar el imperator.
