Chi se lo pol dimenticar. Mi ero mulo e andavo fin al molo a curiosar, e cosa ghe era de più bel che star sul molo a guardar i atrachi, le manovre che fazeva le barche per acostarse e i omini che butava le gomene per ligar la nave. E tuto quel rumor de motori al massimo e quel mover del mar. Po’ la gente che andava su e zo, saliva e scendeva.Era sempre come una festa. Ma per mi de picio era festa granda quando i mii genitori i decideva de andar col batel a Abbazia. Apena che se imbarcavimo mi andavo fin su la prua a veder le onde del mar tajade, e quei bei spruzi de s’ciuma che se alzava, e a nasar quel forte odor de salsedine. E sicome ero masc’ieto e gić de picio me piaseva la tecnica, alora andavo anca a cucar in te la sala machine, de dove vegniva su un forte odor de oio e de grasso. Non so prorpio come spiegar quel odor a parole. Era un odor particolare che ben conosse tuti quei che naviga e che abordo lavora in machina conosse ben. E po’ se vedeva tute ste leve, ste robe strane che se moveva e che faceva un fracasso teribile. E noi fioi stavimo drento fin che noi ne scaziava. “Non se pol star qua, andè sul ponte mularia" – ne dixeva i marinai. E alora ne tocava andar fora.
I mii non sbarcava a Abbazia, che era roba de grandi signori, ma i andava avanti per Ika, dove el molo era picio e una volta anca de legno. Vicin ghe era un ristorante e un albergo indove che se magnava pesse apena pescado. E se stava là fin che non faceva scuro. A Ika ghe era anca una fabrica de pesse in scatola. Me ricordo che ghe rivava sti barconi de pescadori a portar grandi ceste piene de pesse per la lavorazion in fabrica e a noi mularia, che stavimo là sul molo con le togne, i ne regalava manciade de pesseti per esca. Ma ciapavimo pesseti pici. Qualche glavoz e qualche boba. In tel ristorante invece, oltre a tanta bira e a vin bianco, i gaveva pessi grandi che le done de la cusina le netava su la riva sassosa slavazandoli in acqua dopo che le ghe gaveva netado le interiora. Era bele putele de quela cusin. Fin che le lavorava le stava discalze sui grabeni e le cantava: E me ricordo che la roba più bela era veder el mar de sera, quando che i pescadori del posto cominciava a andar fora del porto e po’ i impizava le lampare
A Ika ghe era forti sorgenti de acqua dolce e l’acqua lel mar era per questo più freda de altri posti. E per via dela fabrica de pesse, che butava in acqua i resti dele sardele che finiva in scatola, certe volte capitava anca de avistar pesecani. I muli del posto i se vantava de saper pescar con le lampadine. E me ricordo che i ingrumava lampadine vecie, i ghe fazeva un buso soto e i ghe infilava drento un filo de spagna con in zima un amo. Po’ i molava ste lampadine in mar lassandole a galegiar, portade dala corente, fin che non le cominciava a “balar”. Co capitava, voleva dir che gaveva abocado qualcossa e alora i muli andava fin là indove che le era arivade, per ingrumarle con tuto el pesse che le gaveva soto.
El vaporeto de Abbazia, come le coriere della ditta “Gattoni” se scampà de Fiume dopo la fine dela guera come molti de noi esuli. Molti ani dopo go sapudo che el faceva servizio de Napoli fin Capri e che el gaveva i colori dela vecia bandiera fiumana sul camin.
Alfredo Fucci
